Bordoja fton bardhezinjtë të bisedojnë për Çamak

Maruan Çamak, sulmuesi i skuadrës së Bordosë, është prej disa kohësh pjesë e axhendës së drejtorit sportiv të Juventusit, Alesio Seko. Ditën e djeshme, vetë presidenti i klubit francez, Zhan-Luis Triaud, ka ftuar drejtuesit e “Zonjës së Vjetër” të nisin bisedimet për kryerjen e një transferimi të mundshëm. Një ftesë e tillë ka ardhur edhe si rrjedhojë e faktit se vetë Çamak (13 gola në sezonin e kaluar) ka shprehur dëshirën e tij për t’u veshur bardhezi. “Nëse na vjen një ofertë e Juventusit, sigurisht që do të jemi të gatshëm ta vlerësojmë atë. Ne nuk duam ta shesim lojtarin, por ai na ka thënë se tani kërkon një skuadër më të madhe për të treguar realisht vlerat e tij dhe, padyshim, që Juventusi do të ishte një zgjedhje e përkryer”.